Friday, July 8, 2016

මොනර කිරිල්ලී - 05




මොණර කිරිල්ලී - 5

තද සීතලක්  දැනිලා වෙනස්ම තැනකින් අවදිවුනු  යශෝරාවී තමන් මේ ඉන්නේ කොහෙද කියලා හිතමින්ම ඔන්ච්ල්ලා බංකුවේ ඉදගත්තා.. පෙරදා රාත්‍රියේ උනු හැමදේම සිතුවම් පෙළක් සේ ඇගේ මනසේ පෙළ ගැහෙන්න ගත්තා.. ඒ සියල්ලක් මකා දමන්න නොහැකි සත්‍යයක් ලෙස ඇගේ තුල ජීවමානව තිබෙන බව දැනෙද්දී ඇගේ සිතට පිහි තලයකින් පසාරු වී යන තරමේ වේදනාවක් දැනුනා..  තමන් යමක් කලයුතු බව ඇය දැන උන්නා...  එහෙත් ඒ කුමක්ද යන්න සිතීමට ඇගේ සිත කල් ගත්තා... යමෙකු හා කතා කලයුතු බව ඇගේ සිත කිව්වා.. ඒ කවරෙක්දැයි ඇගේ සිත හැදිනගෙන තිබුනේ නැහැ..  ඇය හෙමිහිට පඩි බැහැලා පහලට ආවා.. එහෙත් ගීත්ව දකින්න මැලිකමක් ඇගේ හිතේ ඉපදිලා තිබුණා. ඇය කාමරය දෙස නොබලාම කුස්සියට ගියා..  නීලියා  කිරිබත් හදනවා..   යශෝගේ මුහුණට අලස හිනාවක් නැගුනා...  ‘ නිළියට අපේ වෙන්වීම සමරන්න හිතිලා...’ යශෝ එහෙම නොකියම වීදුරු කෑම මෙසෙන් ඉදගත්තා.. නීලියා වතුර වීදුරුවයි  කිරිකොප්පෙයි දෙකම යශෝ ලගින් තිබ්බා...

“ මහත්තයා අද උදෙන්ම ගියා.... තිරිකුනාමලේ යන කතාවක් කිව්වා.. මං නැගිටින කොට ලෑස්ති වෙලත් ඉවරයි...  තේකක් විතරයි බිව්වේ..’

යශෝ මුකුත්ම කිව්වේ නෑ.. නීලියා කියපු දේ ඇහුනු නැහුනු ගානට තරමක් ඇතින් පෙනුණු , වර්ණවත් රෝස මල්  වැටිය පුරා එහා මෙහා ඉගිලයන සුන්දර සමනලුන් දෙස බලන් හිටියා..

“ දවස් තුනකින් එන්නේ කිව්වා....  බෙබිව පරිස්සමෙන් බලාගන්න කිව්වා...”

 දවස් කීපයකට පෙර ගීත් දවස් තුනකට ත්‍රින්කෝ යන බව කියපු බව යශෝට මතක් උනේ ඒ වෙලාවේ... මේ සිදුවීමත් සමගම එය වඩාත් යහපත් දෙයක් බව යශෝරාවිට හිතුනා..   රාත්‍රිය තුල දැනෙන්නට තිබුණු පීඩාව  ටික දිනකට ඇතට යන බවක් ඇයට දැනුනේ...

“ මං කිරිබත් ඉව්වේ... අද පළවෙනිදානේ...  සුදු බේබි  නම් ඉතිං කොහොමත් කැමතිනේ.... අපරාදේ මහත්තයා වේලාසන ගියේ...”

යශෝ මිදුලට බැහැලා වත්ත දිහාට ඇවිදගෙන ගියා..  තමන් මේ නිවහන ගොඩනැගුවට ඒක නිවහනක් කලේ යශෝ බව ගීත් බොහෝ වාරයක් කියා තිබුණු බව ඇයට සිහිපත් උණා... මේ හැම ගහකම මල් පිපෙද්දී,  ගෙඩි හැදෙද්දී තමන් අපමණ සතුටු උන බව ඇගේ මතකයට ආවා.. මේ සුන්දර ගෙවත්ත මේ තරම් අපූරුවට සකසාගන්න තමන් වෙහෙසවූ බව වෙනදා සතුටින් සිහිපත් කලත් මේ වෙලේ යශෝට දුකක් දැනුනා..  සියල්ල දෙස යලිත් ආගන්තුකව බලන්න ඇයට ඕනේ උණා.  එහෙත් දැඩිව ඇලුම් කල සියලු දේ හැර යාමට පළමුව ඒ දෙස බලන පෘතක්ජන ගැහැණියකගේ ශෝකය පමණයි ඇගේ හැම ඉරියව්වකම ලියවිලා තිබුනේ..   
“ බේබි... මං ආරාමෙට ගිහින් එන්නම්. ...”

  නීලියා ඇවිත් කිව්වේ හැන්දෑවේ යශෝරාවි කොහේ හෝ ඇවිදින්න යන්න හිතමින් ඉන්න වෙලාවේ...

“ මාත් එන්නද...?.”

“ අපොයි... කොයි තරම් අපූරුද...  සුදු බේබි ඉතින් පල්ලි යනවා මිසක් පන්සල් යන එකක්යැ “

“ කොහොමද යන්නේ...”

“ ටිකක් දුරයි...  අපි වෙල දිගේ ගිහින් අර වෙන්දේසි කරන්න පොල් ගස් ගලෝපු ඉඩමට ගොඩවෙලා ඒ අයිනේ පාරෙන් පයින් යමු...  මහා පාරෙන් යනවා නම් ලොකු වටයක්.. ඒත්.. සුදු බේබිට එච්චර දුර පයින් යන්න පුලුවන්ද...?

“ පුළුවන්... ඉන්න මං එන්නම් ඉක්මනට..  “

නිලියාගේ කතා බහටම ගැලපෙච්ච  පාරේ අපූරුව විදිමින් යශෝරාවී ඇවිද ගියේ හිතට ශෝකයක් ගෙන ආ කිසිවක්ම ගැන නොහිතා.. දෙපා රිදුම් දුන්නත්... වෙහෙසක් දැනුනත්.. මොකක්දෝ හිනි සතුටකුත් යශෝගේ හිතට දැනුනා..

“ මේ හරිය  හරියටම ගමක් වගේනේ නීලියා... “

“ ආරාමෙට ගිහින් බලන්නකෝ සුදු බේබි පුදුම වෙයි...”

 ආරාමේ තිබුනේ හරිම නිස්කලංක භූමියක... හිත නිවාදමන්නම වෙන්වෙච්ච..
නීලියා අරාමේ දිහාට ඇවිද යද්දී යශෝ වෙල අයිනේ තිබ්බ උණ ගස් මන්ඩියට යොමු වෙච්ච ගල් පඩි පෙළ බැස්සා ඇයට ඕනේ උනේ එතන තිබුන පොකුණ ලගින් වාඩිවෙලා ඒ පරිසරයේ නිස්කලංක බව අත් විදින්න..  එතන ඉදන් බලද්දී පුරන් වෙච්ච කුබුරු යායත් උස් ගොඩැල්ල මත ගෙවල් ටිකත් අපූරුවට පෙනුණා.. මෑතින් තිබුණ උණ ගස් අතරේ ගල් තලයක භාවනා කරන මෙහෙණියක් ඇය දැක්කේ බොහොම වෙලාවකට පසුව...  සිත්කළු මුහුණක් තිබුණු ඒ තරුණ සිල් මාතාවගේ නිස්කලංක ඉරියව්ව යශෝරාවිගේ හිතට මොකක්දෝ දෙයක් කියමින් හිටියා.

තවත් බොහෝ වෙලාවකට පසු ඇය නෙතු හරින තුරුත් බලන් ඉන්න යශෝගේ හිත ඉවසිලිවන්ත වෙලා තිබුණා.

“ ඔය ඇත්ති මං හම්බවෙන්නද...”

“ ආවේ නම් එහෙම හිතන් නෙමෙයි... ඒත්... ඔබතුමිය එක්ක කතා කරන්න තියනවා නම් හොදයි...”

“ මේ පරිසරයට ඔබේ හිතට සැහැල්ලුවක් ගෙනත්... ”

“ ඔව්.....  ඔබ තුමිය මේ විදිහට භාවනා කරනවද හැමදාම.... “

“ ටික කාලයක් මගෙන් ඒක අතහැරිලා තිබුණා....  “

“  භාවනා කලහම මොනවද ලැබෙන්නේ...”

“ තමන්ට තමන්ව මගහැරෙන්නේ නැහැ... ”

“ ඔබතුමිය කියන දේ මට තේරෙන්නේ නෑ...”

“ ඔබ ඉන්නේ ශෝකයෙන්... “

“ ඔව්...”

“ ඔබේ හිත කරදර වෙන්නේ යමක් අත්හැර ගත නොහැකි ශෝකයෙන්...  මේ සියල්ල ඉවර වෙන බව සිතන්න... ඔබේ සිතට දැනෙන සතුට... දුක... කලකිරීම...  මේ  සියල්ල නිමා වෙනවා.... එකම සිදුවීමක් ගැන රාත්‍රියේ ඔබට දැනුනු සිතුවිලි උදැසන වෙද්දී වෙනස් වෙනවා....  ඊළග දවසේදී  ඒ සිද්දිය ගැනම ඔබ බලන්නේ තවත් විදිහකට...  ඒක තමයි සිතේ ස්වභාවය... හිත ගේන අරමුණු වල ඔබ බැදෙන්න එපා.. ඒවාට ගලා යන්න අරින්න.... “

“ ඔබ තුමිය කිව්වේ ඇත්ත... මට දෙයක් අත්හරින්න සිද්දවෙලා තියනවා...”

“ ඔබට ඒක කරන්න ඕනෑ කමක් නෑ...  “

“ ඒත්......  මට ඒක කරන්න ඕනෙ ...”

“ ගිහි ජීවිතේ තියෙන බැදීම් වෙනස්... දෙයක් අතහරින්න හිතුවාම... තව තවත් ඒ ඇතුලෙම බැදෙන හිතුවිලි තමයි පහල වෙන්නේ... ඒත් අපිට දෙයක් අතහරින්න ඕනේ උනහම ඒක සනාථ කරන සිතුවිලි තමයි හිතට එන්නේ...”

“ මාව ප්‍රතික්ෂේප උනාට පස්සෙත් මට එතන ඉන්න ඕනේ කමක් නැ...  ඒත් මට තේරෙන්න නෑ..  මොකද්ද මං කරන්න ඕනේ කියලා...”

“ මේ වෙලාවේ ඔබේ හිතුවිලි ගෝෂා කරනවා... ඒවට සන්සුන් වෙන්න ඉඩක් දෙන්න....  ඉන් පසුව ඔබේ හිතම කියයි කලයුතු හොදම දේ ගැන... එය ඔබටම දැනේවි... “

“ ඔබ තුමියට ස්තුතියි...  ඔබතුමි කලින් කිව්වා වගේ මට මාවම තේරෙන්නේ නැතුව ගිහින් තියෙන්නෙ..”

“ මේ හිතේ ස්වභාවය... ගිහි පැවිදි කියලා වෙනසක් නැහැ...  හිත ගැටුම් රැගෙන එන මුහුණුවර විතරයි  වෙනස් වෙන්නේ ... පැවිදි ඇත්තෝ හිත පුරුදු කරලා තියෙන්නේ.... ගිහි ඇත්තෝ එහෙම නෑ...”

“ අද උදේ  මට ඕනැවෙලා  තිබුනේ   කාත් එක්ක හරි කතා කරන්න....   ඒත්...  මේ  කාරණාව ගැන නම් නෙම්මෙයි...  වෙන මොනවම හරි දෙයක් ගැන...  ඒත්...  මට දෙවමනියෝ පාර පෙන්නලා තියෙන්නේ හොදම තැනට එන්න..  .”

“ ආගමකින්  කරන්නේ හොද තැනකට පාර පෙන්නන ඒක තමා....”

“ ඔබතුමිය කොහොමද මේ තරම් ලස්සනට හිත ගැන කතා කරන්නේ...”

“ මගේම අත්විදීම් තුලින්.....   මගේ හිතට පහුගිය කාලේ ආගන්තුක හිතුවිලි පහල වෙන්න ගත්තා....  ඒක  මං බලාපොරොත්තු නොවුණු ස්වභාවයක්.....  මං මුල් දවස් ටිකේම කලේ ඒවා යටපත් කරන්න හදපු ඒක...  එතකොට ඒවා වද දිදී මං පස්සෙම ආවා....  මං මේ ආරාමේ ටික දවසක් අත් ඇරලත් ගිහින් හිටියා...  ඒත් මගේ හිත මාත් එක්ක ගියා..  ඒ නිසා... ඒ හිතුවිලි  නැවතුනේ නැ...  මං ඉන් පස්සේ හිතුවිලි දිහා බලන් උන්නා.. ඒවා වෙනස් වීම ගැන විමසිලිමත් උණා... මට දැනුණා මගේ හිතුවිලි සන්සුන් වෙනවා..  මට පහසුවක් දැනුනා...  මං වටේ සිද්දවෙන හැමදේම සන්සුන් වන බවක් පෙනුනා...  කේන්තිය වගේ දේවල් මට ආගන්තුක වෙන්න ගත්තා...

බුද්ධ දර්ශනයේ මේ දේවල් බොහොම අපූරුවට  විස්තර කරනවා...  ඒත් ඔබ මේ තේරුම් ගත්ත තරමවත්....  තේරුම් නොගත්තු  බොද්ධයෝ ඉන්නවා  ඕනෑ තරම්...  “

“ මං අහලා තියනවා  බොද්ධ දර්ශනය ගොඩක් ගැබුරු එකක් බව...  ඒත්... මං ඉගෙන ගත්තේ කන්‍යාරාමෙක... ඒ නිසා මට ඉඩක් ලැබුනෙම නෑ පොතක්වත් කියවන්න ....”

“ අපි ආරාමෙට යමු ඔබ මේ කිට්ටුවද...?   “

ආරාමේට ගිහින් ආවට පස්සේ  යශෝරාවිට දැනුනේ සැහැල්ලුවක්...  ඒක වචන වලට පෙරලගන්න කොහෙත්ම පුළුවන් කමක් තිබුනේ නැ...  දවස ගෙවී යද්දී ...  ඇගේ හිත ඇයත්  සමග එකගවෙමින්  හිටියා.. 

දවසක් ගෙවිලා ගිහින් තවත් දවසක් උදාවෙමින් තිබුණා..   යශෝරාවිගේ හිතේ අලුත්ම සිතුවිලි ඉපදෙමින් තිබුණා... ඇය තීරණය කරමින් හිටියා...   උසාවියකට නොගිහින්  ලිපියකින්  ගීත්ව  නිදහස්  කර  දමන්න...   කොන්දේසි වලින් තොරවම...    ඒ ලිපිය  තමන් ගියාට පසුව ගීත්ට  ලැබෙන පරිදි  ඔහු හා ඒ ගැන තවත් කිසිවක්ම කතා නොකර ඉන්නත් ඇය හිතුවා..  එලෙසින්ම   නිහඩවම  නිවසින් පිටව යන්නයි ඇගේ හිත  උපදෙස්  දෙමින් තිබුනේ... 
  තමන් කොහේ ජීවත් වෙනවද යන්න ගැන ගීත් දැන නොගතයුතුබව පමණක් ඇය හිතුවා..    මේ සියලු තීරණ වලට පසුව   යශෝගේ  හිතට දැනුනේ පුදුම සැහැල්ලුවක්...   ඉදහිට දකින දෙයකින්  හිත පැරණි මතක අස්සට රිංගුවත්  ඒ සැනෙකින්ම ඇය එය ඉන් මුදා ගත්තා...  මේ වන විට ගීත් සමග වෙනදා වගේම කතාකරන්න පුළුවන් බවකුත් ඇයට දැනුණා..   ගීත් එන්න  දවසක්ම ඉතුරු වෙලා තිබුණා..




 ( ඊලග කොටසින්...) 

Tuesday, June 28, 2016

මුත්තාගේ කොලම



මුත්තාගේ කොලම ....

(පළවෙනි කතා සංතැසිය )







කැලෑ පත්තරේ විත්තිය


දෝණින්දෑ ඇවිත් මොකද්දෝ චූරනිකාවක් ඒකිගේ අම්මන්ඩිත් එක්ක දෙසාබනවා මං අහගෙන . ..  එකෙන් මේකෙන් උනේ මිණිපිරී මගේ බුලත් වංගෙඩිය කොටා දෙන්න සුනංගු වෙච්චි ඒක...  හැන්දෑවට බුලත් විඩක් එදාගන්නේ නැතුව හාන්කාව වගේ හින්දා මාත් උන්දලාගේ කතාබහට කණ දැම්මා කියහන්කෝ...  බොලේ අප්පා....  අපූරු මාත්තුරුකාවක්නේ  උන්ගේ කතාව වෙලා තිබ්බේ...

“ අම්මාට  කියන්න.... ඒක කවි කොලයක්ම නෙමෙයි...  කැලෑ පත්තරයක් වගෙයි..  “

“ ඉතින්.....  මොනවද තිබ්බේ....”

“ අපි අර මඩුගල්ල මැඩම් ගැන කනින් කොනින් අහලා තිබ්බ කතා ටික ඊට වඩා සැරට ලියලා තිබ්බා....   මොනවා උනත් අම්මා ඒක ලියාපු කෙනාට...  හොදට  කවි ලියන්න පුළුවන් හැකියාවක්  නම් තියෙනවා...  “

“ ඕවා ඉතින් ඔය ගහන්නේ ලියන කෙනාම නෙමෙයි...”

“ ඇත්තමයි අම්මා කවි වලින් මේ හැටි කුණුහරප කියන්න පුලුවන්ද හිතෙනවා “

  කවි කොලේ ගැනවත්, කැලෑ පත්තරේ ගැනවත් ගනිච්චියක් නැතුව කරන කතාබහ අහන් ඉන්න බැරි කමටමයි මං උන්දැලගේ කතාවට හොස්ස දැම්මේ..  මං  පත් කැලෑ පත්තරේ ගැන හැබෑ විස්තොරේ කියන්න ගත්තම මිණිපිරී  ඉබේම ගිහින් බුලත් වංගෙඩිය ගාවින්  ඇන තියාගත්තා..  උන්දැගේ අම්මණ්ඩි.... ඒ කියැව්වේ  මගේ දොනියෙන්දෑ  කොහෙද තිබ්බ ගෙත්තමකුත් උස්සන් ඇවිත් පතු පුටුවට බර උණා.. මගේ මායියත් පිළිකන්නේ ඉදන් ඇවිදිල්ලා කොරලා  පිලට පැදුරක් දැම්මේ.... මගේ  කතාවේ වරුණාව උන්ද සහසුද්දෙටම දැනන් උන්නු හින්දා...

‘ ඔය.... කැලෑ පත්තරේ  19 වෙනි සියවසේ මැදකාලේ මේ රටේ හරි හරියට පොරසිද්ද උනාට මොකද ඕක පටන් ගත්තේ නන් මීට අවරුදු තුන් හාරසීයකට ඉස්සොර ..   ඕනෑ රටක සාහිත්තියක් දියුණු වෙන්න බලපෑවේ ඒ රටේ ආගම ධරුමේ නොවැ.. ඉතින් අපිටත් එහෙම්ම තමයි ඔන්න... ඔය අපේ රාජාවලිය කියන පොතේ තමයි මුලින්ම මේ උපහාසාත්මක සීපද හම්බු වුනේ... අරිට්ට කීවෙන්ඩු කියන ආඩි ගුරෙක් ගැනනේ ලියවිලා තිබුනේ...

ආඩිගොල්ල එක                   එකටයි...
කොක්කනම් පයිය වෙන   වෙනමයි...

ඉන්පස්සේ .......  මං කිව්වේ  මුල් කාලේ ලියවෙච්ච  බොහොමයක් කැලෑ
පත්තොර  පෙත්සන් විදිහට තමයි ලියවුනේ.. අපේ ධර්මපාල තුමන්ගේ අවදියේ.. ඒකාලේ ආගම... ජාතියට වින කොරන උන්ට තමයි වැඩියක්ම කැලෑ පත්තර වැදුනේ...  අපේ අප්පොච්චියත් එතුමාගේ වියපාරේ පස්සේ වැටිලා හිටියා නෙව...  ඒ කාලේ දුසිල්වත් හාමුදුරුවන්ට හිට කල පත්තර වැදුණානේ අම්මපා..  

‘කැලෑ  පත්තරේ වගවිත්ති කිව්වා මදැයි ඔය..... අර ඒ කාලේ රහ කොර කොරා කියන කවි පන්තියෝක් කිව්වනන්නේ අපේ රාලහාමි හොද... ‘

‘ අනේ ඔව් අත්තේ...’

මගේ මායියයි මිණිපිරී එක්කාසු වෙලා මගේ කතාව වෙනෝම පැත්තකට තල්ලු කරලා දැම්මා..

‘හ්ම්ම්ම්......   ඔන්න ඒ කාලේ මන්ත්රොන සබාවේ .... ඒ කිව්වේ දැන් ඔය තියන පාර්ලිමේන්තුව වගේ එකේ.... හිටියා කතානායක වරයෙක්...   උන්දැගේ නම මේ..... මේ.... බොහොම පොරසිද්ද එකක්... කැලෑ පත්තරෙත් එපමණටම පොරෝසිද්ද උන ඒ හින්දම...’

‘ ඔය කියන්නේ ප්‍රැන්සිස් මොලමුරේ  මහත්තයා ගැන වෙන්නොනේ...’

අපේ  මායියා  කතාව නොකිව්වා උනාට මංම කියලා අහන් ඉදලද කොහේදෝ...... අපූරුවට කතාවේ නම් ගම වග විත්ති දැනන් උන්නා..

‘ ඒ කාලේ නගර සබාවේ හිටියා අසරප්පා කියලා දොස්තර මහත්තැන් කෙනෙක්...   උන්දැ දික්කසාද නඩුවක් දැම්මා තමන්ගේ නෝනට විරුද්දව...  ඒ කාලේ දැන් කාලේ වාගේ දික්කසාද නඩු තිබුනේ නෑ..  ඊටත් වඩා කාරිය උනේ දොස්තර මහත්තය තමන්ගේ නෝනාගෙන් වෙන් වෙන්න ඕනේ උනේ....ඔය කිව්ව මොලමුරේ අප්පෝ දොස්තර මහත්තැන්ගේ නෝනා එක්කලා තිබ්බ පෙම් හුටපටයක් හින්දා.... උන්දැ වන්දියකුත් ඉල්ලුවා මොලමුරේ මහත්තයාගෙන්...  කොහොමින් කොහොමින්  හරි මේ නඩුව උසාවියේ ඔප්පු උණා..  මොලමුරේ අප්පෝ රටේ කතානායක වෙච්චි...ලීලාවතී නෝනා ගුරුවරියක්  වෙච්චි....    ඒ කාලේ මේක හාහෝවට..  රටේ පැතිරෙන්න ගත්තා..  පත්තර වල මුල් පිටුවේ ගියා...  කවි කොළ...  කැලෑ පත්තර හරි හරියට....  මේ කැලෑ පත්තරේ කිව්වේ ඒක ගැන තමයි...’


කවුන්සිලේ වැජබෙන ධනපති                                            රොත්ත
කම්කරු ගොවින් මිරිකා මොළ කන                                      හැත්ත
දැන් දැන් දිග හැරෙයි කොයි කාගේත්                                   ඇත්ත
මොලමුරේ මැතිදු ලේව්වලු ලීලගේ                                     ...........

කුල නිල ධනය හිස මුදුනේ තැබූ                                               නිතී
සුල මුල පටන් අදිරද  සුද්දන්ට                                                 ගැතී
කෙල නීති අචල කෙලි පරබුන් සමග                                          රති
බල ලෙල්ලම් වූ රග මොලමුරේ                                               මැතී

ලක තුල පරසිදු ඉලව් වලව්වල වල්කම් ටික ටික             එළිවෙන්නේ
මොක මොකවත් කර ගූ ගෑවුනු තැන් හොදන්නයි උන්       දගලන්නේ
එක එක ගැනුන් සමගින් ........ විරවාගෙන මූ දැන්                 ඉන්නේ
දුක දුන් උන්ගේ සාපය වැදිලයි මේ කරුමය පඩිසන්             දෙන්නේ


ඒ කාලේ ඔය කාරණාව ගැන කවි කොලත් ලියවිලා තිවුන මට මතකයි... ‘
‘ අනේ අත්තේ එකත්  කියන්නකෝ...’

කවිකොලවල කාරණා විත්ති ඔය වගේ සැරපරුසේට ලියවෙන්නේ නැ මිනිපිරියේ...  කවි ලියන අත්තොන්ගේ  හිතේ වපසැරියට  ඔය  කාරනා කාරණා මැදිහත්ව තමා ලියන්නේ ගොඩක් වෙලාවොට...’

‘ ඉතින් කියන්නකෝ අත්තේ...’

බිරිදගේ සොර සැමි කමකට තේරුවේ  ලක තුල නම් දැරූ පුතෙක්ම                     වේ
රුවද කුලය දන නම්බුනාම බල සැමකින් ඉතිරි පැතිරුම                                      වේ
හඩද දනන් තුඩ තුඩ පිළිරැව් දෙන වන්සේ උතුම් මහා මුලක්ම                               වේ
වරදකරුව දැන් පෙනී සිටින මේ මහතා නම් රජ කෙනෙක්ම                                 වේ

ලක තුල තිලක වූ රදල පෙළපතින් පැවති එන මොලමුරේ                              නාමේ
ලක තුල මැතිසබේ ‘ස්පීකර්’ වන ඒ.ඇප්. මොලමුරේ මැති ගැන                           මේ
රුව දුල ‘ලීලාවතී අසරප්පා’ මැතිනි සමග රහසේ                                           විසීමේ
සුල මුල පහදා දොස්තර මහතා දික්කසාද වන ලෙස                                      කරුමේ

‘අත්තේ.........’

‘ හරි  හරි...  අනිත් දොහේ කියන්නංකො....  මං තවත් පොරසිද්ද කවි කොලේක  විත්ති... උබ දැන් ඔය බුලත් විඩේ කොටහන්කෝ....’







Wednesday, June 22, 2016

මොනර කිරිල්ලි - 4







මොණර කිරිල්ලී - 4 







ගත  පුරා ගලාගෙන ගිය උණුසුම් වතුරට යශෝගේ හිතුවිළි උණුසුම් කරන්න පුළුවන් උනේ නෑ..    නිදන ඇදුමක් ඇගලා ගත්තත් ඇයට අයිති ඉඩ කොටස ඇදේ ඒ විදිහටම තිබුනත්...  නින්ද ඇගෙන් බොහොම දුරකට ඉගිල්ලිලා ගිහින් තිබුණා. ගීත් ඇදුම් පිටින්ම ඇදේ වැතිරිලා හිටියේ හැබැවටම නින්ද ගිහින්ද කියලවත් හිතන්න යශෝට ඕනේ උනේ නෑ... යශෝ හැගීමකින් තොරවම සෙමෙන් පඩි නැග්ගා. 

සුදු බේබි... කෝපි එකක් හදන්නද...?”

ඉහල මහලේ වහලක් නැති එළිමහන් අංගනයේ ලොවි බංකුවේ ඉදන් ඉහල බලන කොට යශෝරාවීට පෙනුනේ වළාකුලක්වත් නැති හිස්ම හිස් අදුරු ආකහේ විතරමයි.. තමන්ගේ ජීවිතෙත් ඒ වගේම හිස් වෙලා ගිහින් නේද කියලා යශෝට හිතුණා.. ඇගේ කදුළු ගල් ගැහිලා තිබුණු නිසා ඒවා සිතුවිලි හා එකතු වෙන්න කිසිම සුදානමක් තිබුණේ නැ.. යශෝගේ හිතුවිළි කිසිම පිළිවෙලක් නැතුව ඇගේ ජීවිතේ ගෙවිච්ච මතක ලග නතර වෙමින් ගමන් කරමින් උන්නා..

 කෝපි එක... සුදු බේබි ....

“..................”

සුදු බේබි දැන්ම නිදාගන්නේ නැද්ද...

නීලියා නිදාගන්න.... මං ටිකක් ඉදලා එන්නම්... මහන්සියි,....

සුදු බේබිට සීතලේ ඒවි... ඉන්න මං බ්ලැන්කට් එකක් අරන් එන්න...

ඕනේ නෑ... නීලියා..  නිදාගන්න...

කුඩා කල තමා හදා වඩාගත් මේ ගැහැණිය අවසානයේ සිය දයාදයේ කොටසක්ව මේ නිවහනට පැමිණ නිවහනෙම  කොටසක් වෙලා ඉන්න බව මතක් උනහම  යශෝගේ හිතේ කවදාවත් නැති තරමේ සෙනෙහසක් ඇය ගැන පහල උණා.  තමන්ගේ මුහුණේ පුංචි ඉරියව් පවා කියවන්න  පුංචි කාලේ ඉදලම  ඇයට පුළුවන්  මතක් උනත් යශෝ ඒ ඔස්සේ හිත වෙහෙසවන්න්න හැදුවේ නෑ..   යශෝට ඕනේ උනේ හිත සැහැල්ලුවෙන් තියාගන්න නිසා... ඇය  බොහොම ඇතින් පෙනෙන තරු දිහා බැලුවා.. ඒත් ඒ තරුත් එක්ක වෙනදා වගේ.. කතාකරන්න ඕනේ කමක් ඇයට තිබුනේ නෑ.... නූවී හැඩකාර ගමනින් ඇවිත් පුළුන් බෝලයක් වෙලා යශෝගේ ඇගට තුරුල් උණා.


යශෝගේ හිතට වරින් වර ඇවිත් අතීත මතකයන් එබිකම් කරමින් යන්න ගියත්... ඒවා පස්සේ පන්නගෙන ඒ වටේ එතෙන්න මේ වෙලේ යශෝට ඕනේ උනේ නෑ..  ඇයට ඕනේ උනේ හිතුවිලි වලින් මුක්ත වෙලා ඔහේ ඉන්න විතරයි..    මේ වගේ වෙලාවක හිතුවිලි පස්සේ දුවන්නවත්..  තීරණවලට එලබෙන්නවත්..  කොහෙත්ම ඕනේ නැති බව ඇය දැනන් උන්නා. හැම දේම නිස්කන්සුවේ හිතන්න....  හිතට වෙලාවක් සොයා දිය යුතු බව පමණක් ඇය සිතුවා...


දුකක් උනත්... සතුටක් උනත්... දිගටම තියෙන්නේ නෑ කියලා ඇගේ හිත යලිත් මතක් කරලා දුන්නා..  මේ තියන මනෝභාවයන් උනත් හෙට වෙද්දී යම් පමණකට සන්සුන් වෙන බව ඇය දැනන් උන්නා..  මේ අහස් වියන යට තමන් අසම්පූර්ණ ආත්මයක් විතරක්ම පමනක්බවත්.....  කොහොම උනත් ඇගේ කිසිම සිතුවිල්ලකට ගීත්ව කැන්ද  නොගන්න ඇගේ  හිතුවිලි පරිස්සම් වෙලා තිබුනා. ඇය ඇගේ හිතුවිලි වලට බලෙන්ම පාර පෙන්නුවේ පුංචි කාලේ සුන්දර මතක දිහාට..  ලොකු වෙහෙසක් නැතිවම යශෝට ඔන්චිල්ලා බැංකුවේම නින්ද ගිහින් තිබුණා..


පාන්දර යාමේ ඇහැරුණාම පුරුදු විදිහට යශෝව ලංකරගන්න හදද්දී යහනේ තමන් ඉන්නේ තනිවම කියලා දැනුනාම ගීත් ඉබේටම ඇහැරුනා... පෙරදා රැයේ වූ හැම සිදුවීමක්ම ඔහුගේ මතක අතරට පිවිසෙද්දී..  ඔහු  බියට පත් උණා.  ඇගේ ජීවිතය දෙදරා යන බව දැන දැනම  ඒ කතාව  තමන් මොන තරම් නොහික්මුණු මුග්ධ අයුරකින් ඇයට පැවසුවාද යන්න ඔහුට හදිස්සියේම මතක් වෙද්දී මිදී ගත නොහැකි පශ්චාත්තාපයක් ඔහුට දැනුනා..  තමන්ගේ ඒ නොසන්ඩාල කම ඇය මොනතරම ඉවසීමකින් දරා ගත්තද කියලාත් ඔහුගේ යටිසිත මතක් කර දුන්නා..    ඔහු ගේ පුරාම ඇයව සොයලා  නිලියාව අවදි කරන්න හදද්දී තමයි දැක්කේ ඉහල මාලයට යොමු වුනු කම්බි ගේට්ටුව වසා දමා නොමැති බව..  ගීත් සිරුවට පඩි නැග්ගා..   


පැද්දෙන බංකුවේ හීතලේම නිදන් ඉන්න යශෝ දැක්කාහම ගීත්ට ඇය ගැන ශෝකයකුත්.... තමන් ගැනම කලකිරීම  යලිත් වැඩිවෙමින්  දැනෙන්න ගත්තා..  ඒත් එක්කම යශෝ හීනෙන් හූල්ලන සද්දේ අහගෙන ඉන්න බැරි තරම් පීඩාවක් ඔහුගේ හිතට කැන්දාගෙන ආවා..   ඔහු ඇස් වසාගෙන නිහඩ පරිසරය අහගෙන ඉන්න හිතුවත්...  හිතේ ඝෝෂාවෙන් නිදහස් වෙන්න ඔහුට ලැබුනේ නෑ..  අදුරත් සමග එකතු උණු අපූරු දීප්තියක් අහස පුරාම පැතිරිලා ගිහින් තිබුණා...  ඒ එළියේ දීප්තිය  යශෝගේ මුහුණට  වැටිලා  ඇගේ මුහුණ වඩාත් පැහැපත්ව දිදුලමින්  තිබුණා..  ගීත්ගේ වරදකාරී දැඩි හිතුවිලි ඒ සුන්දර රුව අසළ  දියව යමින් තිබුණා..


ගීත් තාරකා ගැන හිතන්න වුනා..  තාරකාව මුලින්ම තමන් දුටුවේ මීට වසරකට පමණ පෙර.. තමන්ගේ ආයතනයට ප්‍රබල තරගකාරී බවක්ව  තිබුණු  ඇය කටයුතු කල වෙළද ආයතනය බිදගෙන බොහෝ වැදගත් ව්‍යාපාරමය තොරතුරු රැසක් සමග ඇය ඔවුන් වෙත පැමිණ තිබුණා..  තමන්ගේ කළමනාකාරිත්වය ඒක පයින් ඇයව ගන්න සුදානම් වෙද්දී ගීත් විතරයි වෙනත් අදහසක් දැරුවේ..

“ මේක එයාලගේ තුරුම්පුවක් වෙන්න පුළුවන්...  මොකද මේ වෙද්දී අපියි එයාලට ලොකුම තරගය දෙන්නේ..”

“ ඒක ඇත්ත .....   ඒත්.... මෙයා අපිට හොද technical  methods  ක් ගෙනැත් තියනවා...”

“ එයා ඒ විදිහටම අපේ මෙතඩ්ස් අරගෙන ආයේ එතනට ගියොත්...  එහෙමත් නැත්නම්... වෙනින් තැනකට...”

“ ඒක නම් හිතන්න වෙනවා තමයි...”

“ අපි එයාව තොරතුරු ගන්න බැරි තැනක තියමු..”

“කොහෙද...??”

“ අපි එයාව මිස්ට චන්ද්‍රගීත්ගේ  assistant   කරමු..

“ ඔව්..හොදම දේ ඒක.... 

“ ගීත් එයාව විස්වාස කරනකම් වගකීමක් නොදී ඉමු...”

ඒ කළමනාකර මණ්ඩලය විසිරෙද්දී සිය මිතුරා පැමිණ රහසින් කල විහිළුවද ගීත්ට හදිස්සියේම සිහිපත් උනේ ඔහුගේ හිත පුරා විදුලියක් කොටමින්..  

“ මචං.... කෝකටත් පරිස්සමෙන්... ගෑනිට තියෙන්නේ sexy look  එකක්...  ආයතනේ details  හොරකං නොකළට උබේ heart  එක හොරකං කරන්න ඉඩ තියනවා.. “


ගීත් ඉක්මනින් පඩිපෙළ බැස ගිහින් නාන කාමරයට වැදුණා..  ඔහුගේ උණුසුම් තිබු සිරුර මත සිසිල් දිය බිදු වැටෙද්දී.. ඔහුගේ සිරුරට දැනුනු සුවය මොහොතකටවත් ඔහුගේ හිතුවිලි වලට දැනුනේ නම් නැහැ..



( ඊලග කොටසින්...)